سلام امروز خستيم بازم(هنده) جه مي گيلانشهر بگم . هيچ وقت گيلانّ انقدر ويران نيدِه بوم . انگار امي گيلان دوره دِه تمام بُسته ننم چره اتو بُبُست ؟ننم او گيلان با اونقدر افتخار امي دوره تا فّرسِه خّيِه خو آخرين نفسانّ بزنه ؟مره خنده گيره خيم ايتا ايتا گرفتاريانّ بگم دينم انقدر زياده كي جه شومارش خارجّ بسته . اّنه اّن اولي!! دو سه خط بوجورّا بخانيد معلوم نيه چي زواني(زباني) ايسه؟ گيلكيه ؟ فارسيه ؟ يا...؟ بعضيان راست گده هرچي گيلان سر بومو خودمان تقصيره، ايتا جا بخاندوبوم وقتي قزلباشاي صفوي گيلانّ بيگيفتوبود و اونّ حاكمه جه خودشان انتخاب بوگودد ايتا روز خوش نيده ئيد اينقدر گيلان مردوم قزلباشان بوكوشتد ؛كي مجبور ببستد جه گيلان بيد بيرون ولي الان چي ؟ گيلكانم ده خوشان وطنّ وِلا گوديد دِه اينقدر بدبخت وگرفتارد كي تنها چيزي كي به اون فكر نوكوند هّه گيلان. هرتا شهر و داهاتّ ميان شي بزور دوسه تا جوان سرحال ديني اوشانم اصلا كسي اّشّنّ نوگوفتد كي گيلان ره تعصب بداريد . من ننم اّمي فارسي حرف زئن از كُيه بومو؟؟ همديگر امرايم خييم گب بزنيم فارسي حرف زنيم؛ حّلِه خوبه فارسيم درست حيسابي حرف نتانيم بزنيم ! الان دِه شمرا قول دهم بوجور تر از 95% گيلكان خوشان زّكّنّ از كوچيكي فارسي ياد دهد حّلِه خودايا شكر ايپچه جه اّ زّكّن ؛ محيطّ ميان دوباره دست وپا بشكفته گيلكي ياد گيرد ؛ ننم دقيقا چند سال ديگه گيلكي كاملا از بين شه هّه الانم رشت ميان نسل جوان زبان ؛نسل تحصيلكرده زبان ؛ فارسي ايسه ! گيلكي كي حرف زنه؟ پيرمرداكان پير زناكان او روستايي كي تازه بومو شهر يا اينفرم ايسّه چون فارسي بلد نيه گيلكي حرف زنه ؛ اونم فارسي ياد بيگيره اّن رِه ِ اُفت دّرِه گيلكي حرف بزنه؛ ان وسي رشتّ مثال بزم چون كي گيلان قلب رشت ايسه وقتي رشت ميان ايچيز جا دكفه سريع موج مّئسّان (منستّان) را دكفه شِه همه جاي گيلان ؛ گيلان هميشه ايتا پيله تر ميرزا مئسان خّيِه رهبر خّيِه حكومت مركزي بايد بفهمه كي بايد اّ زبانان محلي رِه پول خرجّ كونه كي از بين نشد ؛ اصلا اّ نوع حكومتم بايد عوضا به ؛ گيلان رِه نبايد تهران ميان تصميم بيگيرد !! بايد رشت ميان همه جا جيگاآن گيلك نشين رهِ تصميم بيگيرد ؛ حتي او جاهايي كي فعلا جزو گيلان نيه ؛ ننم فدرالي بايد ببه چي بايد ببه مي سواد فنكشه ! ولي اّ شبكه باران بايد اّن همه برنامه يان گيلكي ببه ؛ اگه فيلم وسريالي يم چكوند بايد آدماي مهم جامعه يم گيلكي حرف بزند اصلا فيلماي فارسي يا خارجي يم گيلكي دوبله بوكوند چي اشكالي دّرِه؟؟؟ باور بوكونيد آرسانه ي ديداري انقدر اّن موج قوي ايسه كي تنه 10؛20 سال ميان زبان گيلكي يه زنده بوكونه ؛ تلويزيون مجري بّيه آشكار بگه متاسفم او كساني كي خجالت كشد خوشانّ زكن گيلكي ياد بدد ؛ مردوما بايد تحريك بوكوند اصلا شك نوكونيد كي مردومم دوست دّرد تمام او چيزايي كي فراموشا بسته دوباره زنده ببه؛ ايبار بو شوبوم موزه ميراث روستايي؛ تازه افتتاح بوگودوبود ؛ خلاصه موسيقي محلي لباس محلي معماري بومي نان و كشتا و كاكا و همه غذاهاي محلي وووو.... مردوم بال بيرون بّوّردوبود ذوق گودّندوبود پيله تران خوشانّ زّكّنّ توضيح دئيد كي اّن چيه اون چيه انگار جه زندان صد ساله رها بُبُستوبود؛ جه اّيه بفهمستم كي مردومم تقصيري ندارد مردومم همه جوره خّيد وّگردد ولي اي نفر بايد شورو بوكونه ؟؟؟؟!!!!!! ايتا چيز ديگه اّن ايسه كي مدرسه يان ميانم بايد بطور مداوم واجباري زّكّنّ گيلكي ياد بدد و جِه حالت گفتاري تبديل به نوشتاري بوكوند مردوم بتاند حداقل گيلان اخبارّ؛ روزنامه يان ميان ؛ كيتابان ميان به زبان گيلكي بخاند جه تمام گويشان گيلكي هم ايستيفاده بوكوند ايتا گويش معيار چكوند؛ اصلا همه جا پذيرش و اشتغال و همه چيز ميان اوكساني كي گيلكي حرف زند رِه ايمتياز فدد ؛ راه زياد دريم ولي حتم بداريد كي اما تنيم موفق بيبيم .
آن بخش اول گيلان گرفتاريان و اونّ جه بين بردن راي حلان بو ؛
باخي (بعضي وبلاگان ميان اتو نيويسيد امايم پيروي كونيم) روزاي آينده.
